L’appiigazioni StopCovid validata da a CNIL
Hè cusì chì StopCovid pudaria essa dispunibuli da quì à calchì ghjornu annantu à i nostri teleffunini, sicondu u sicritariu di statu à u numericu, Cédric O. Ma comu viaghjarà ? È à chì ghjova ?
Si tratta quì, pà u guvernu, d’un elementu di primura in la siconda tappa di u so pianu di scunfinamentu prugrissivu discrittu cù sti parolli maestri : « Prutighjimu i nostri, prutighjimuci è prutighjimu à l’altri» da circà à ùn cunnoscia un’antra crescita di l’epidemia di Covid-19 cù sta pussibulità d’agiscia è di riagiscia più prestu sapendu s’omu hè statu in cuntattu o innò incù u virus.
Annunciata à l’usciu di u mesi d’aprili, pigliendu l’asempiu d’unipochi di paesi d’Auropa com’è l’Austria, l’appiigazioni StopCovid hà fattu nascia parechji dubbiti inquant’à u rispettu di a vita privata di quilli chì l’aduprariani è ancu di pettu à a so utilità ch’ùn saria ancu stata pruvata in li paesi ch’ani dighjà missu in opara dispusitivi simuli.
Epuuri, oghji, a CNIL hà datu a so auturizazioni cunsidarendu chì i so ricumandazioni sò stati pigliati in contu videndu chì « cù l’appiigazioni StopCovid, ùn si farà micca una lista di parsoni cuntaminati ma solu una lista di cuntatti cù i so dati sempri trattati incù cugnomi. Hè par quissa ch’ella rispetta u cuncettu di prutizzioni di i dati.»
U scopu di st’appiigazioni hè di dà a pussibulità à una parsona chì hà imparatu a so cuntaminazioni, di falla sapè à quilli ch’ella hà pussutu scuntrà à menu d’un metru è duranti più d’un quartu d’ora in li dui sittimani chì sò scorsi.
Dopu à avè stallatu l’appiigazioni annantu à u vostru smartphone, u sistema Bluetooth chì ci vò à tena attivu è a giulucalizazioni chì si faci di manera anonima v’ani da permetta di riceva nutificazioni da divvi sì vo seti statu in cuntattu incù una parsona malata.
Tandu, sapendu ch’ellu c’hè un risicu, da pruteghja à tutti, vi tuccaria à stavvini appena solu, chjamà u vostru medicu è fà un test da sapè sì vo seti statu cuntaminatu ancu voi.
Par chì l’affari viaghji, ci vò di sicuru chì i parsoni malati si dichjaressini annantu à l’appiigazioni cù un codici datu da u duttori o u laburatoriu, sapendu chì vo stareti sempri anonimi.
Un sistema ch’avaria da permetta à l’auturità sanitarii d’intarvena più à a lestra di fronti à a sparghjera di u Covid-19.
S’aspetta oramai u dibattitu è u votu dumani à l’Assemblea Naziunali da validà a missa in anda di l’appiigazioni.
Intantu, sì l’affari si faci, i risultati, i ci darà l’avvena cù a missa in pratica annantu à u tarrenu.
