Lundi 25 mai 2020

Le Temps des Hordes - Menaces : un rumanzu da scopra !

Image
Anouk Langaney nouvel opus le temps des hordes menaces
Dopu à i so dui prim’opari Même pas morte è Cannibal Tour, hè ghjunta l’ora avà di scopra u terzu rumanzu d’Anouk Langaney chì si chjama Le temps des hordes - Menaces dispunibuli dipoi u 18 di maghju ! St’opara di qualità, scuprimula insemi fenduci un bellu saltu in lu tempu !
Le temps des hordes menace nouvelle bd éditions albiana

Semu in l’annu 2036 è st’epica nova, a scuprimu pà sti lochi di u rughjoni aiaccinu cù u so celi pienu à aeroskatesè à quadcoptères, un mischiu di quad è d’elicotteru !

U prima parsunaghju chì ci parla è ci faci scopra u so universu hè Pierre-Ézéchiel, un zitellu di u culleghju ch’elli ani custruitu annantu à u Monti Gozzi.

Prima, andava à quillu di Balioni ma l’ani rinviatu pà via d’una baruffa chì à Petru, ancu s’ellu hè un bravu zitellu, ùn ci vò mancu à circallu troppu !

Ma avà, và megliu, t’hà i so amichi, travaglia abbastanza bè è in più di quista, ùn s'hè mancu più annarbatu ancu sì certi volti, c’hè sta Louna, una croci parighjina chì li rompi i stacchi …

Sarà un ghjuvanottu com’è tutti l’altri mi diciareti ! Pò dassi. Ah, ma aspitteti un pucarellu, mi sò scurdatu di divvi una cosa…

Sò parechji anni avà ch’ellu hè capaci di senta un cantu, scunnusciutu da l’omi : quillu di i petri è di scogli.

Hè cunvintu ch’elli li sani parlà è ellu l’hà sempri capiti.

Ognitantu, si lagnani è t'ani a paura di fà cascà calchì cristianu, di i timpesti o di i fochi.

O com’è quì, di vranu, chì ùn piovi mai è chì faci un caldu chì si sciuppitteghja !

Quillu vennari, duranti u corsu di biulugia, appena nanzu à meziornu, si mettini à falà i trumbittati d'acqua annantu à u tettu di u stabulimentu.

Si spignini i lumi, tremani i muri è cresci u spaventu. Tandu, Petru t’hà una visioni è senti u cantu di u Gozzi dannighjatu da i fochi, privu di i so arburi cù i radichi chì u tiniani, è assufucatu da i custruzzioni chì u si magnani pezzu à pezzu.

A li dici franca è chjara à Petru : ùn ni pò più u monti è oghji, si n'hà da falà. È pà disgrazia, hè ciò chì hà da accada.

Dopu à u scumpientu, di più cà un’amicizia, hà da nascia una leia furtissima trà unipochi di zitelli, chì prima, pà u più, si cunnusciani appena.

Situazioni strani è priculosi, ci n’hà da essa di più in più, è pianu pianu, Pierre-Ézéchiel, Louna, Ceccè, i binelli Nadia è Moktar è l’altri ghjuvanotti di a banda d’amichi, ani da capiscia chì, s’elli si ritrovani insemi è uniti di pettu à tanti minacci, ognunu cù u so puteri è a so forza, ùn hè micca pà nulla !

Un bellu rumanzu d’anticipazioni chì, par contu meiu, si miritaria di duvintà un filmu o una seria !

È parchì micca ?  

« Le Temps des Hordes - Menaces», Anouk Langaney, Albiana, 2020, 192 pagini, 16€