Una cunferenza è impruvisate nant’à u chjam’è rispondi à Locu teatrale sabbatu u 26 d’aprile in Aiacciu
Anna Catalina Santucci, duttore à l’università di Corsica, prupunerà una cunferenza nant’à u chjam’è rispondi, elementi d’analisi di una pratica di u geniu paisanu, stu sabbatu à 6 ore. Presenterà elementi di a so ricerca. Rammenterà chì u chjam’è rispondi hè un cantu impruvisatu corsu, un veru cunfrontu pueticu d’argumenti in u quadru di regule precise è invarievule in un spiritu di spartera è maestria. Anna Catalina ne hà scurticatu e radiche, è ne sparterà i fundamenti, ma dinù e sfide di a so trasmissione.
Pè trasmettelu, ci vole à riesce a so adattazione à u mondu mudernu è à u so modu di cumunicazione pè ch’ellu sia ricunnisciutu è adupratu da a giuventù. Cusì dice a squadra di Locu Teatrale è cusì ferà sabbatu sera ingiru à un spuntinu, trà flacchine, macagne è altu stile.
À 8 ore è mezu, dopu a cunferenza, si lascerà a piazza à l’impruvisadori cum’è Petru Santucci, Ghjaseppu Micaelli, Jean-Louis Villanova o Paul Calzarelli. L’ogettivu hè di fà campà stu raportu cù a lingua, stu spiritu vivu chì hà impastatu generazione di praticanti liendu lingua, imaginariu, puesia è manera particulare di participà à u mondu.
